სიცოცხლის ხის ფონდისა და კომაროვის სკოლის STEM სკოლაში რეგისტრაცია

სიცოცხლის ხის ფონდისა და კომაროვის სკოლის თანამშრომლობით შექმნილ STEM სკოლაში რეგისტრაცია დაიწყო. მოსწავლეების STEM მეცნიერებებით დაინტერესების, მომავლის პროფესიების პოპულარიზაციისა და ხარისხიან განათლებაზე ხელმისაწვდომობის გაზრდის მიზნით,  სიცოცხლის ხის ფონდი, კომაროვის სკოლასთან თანამშრომლობით STEM სკოლის პროექტს ახორციელებს. STEM სკოლის ერთწლიანი კურსის გასავლელად, მოსწავლეებს წელიწადში ორჯერ - შემოდგომისა და გაზაფხულის ნაკადებისთვის შეუძლიათ რეგისტრაცია. რატომ STEM სკოლა? ინიციატივის ფარგლებში, VII-XI კლასის მოსწავლეებს შესაძლებლობა აქვთ, გაიარონ ერთწლიანი სასწავლო კურსი ონლაინ; მიიღონ როგორც თეორიული, ასევე პრაქტიკული ცოდნა ტექნოლოგიების, ინჟინერიის, მათემატიკისა და საბუნებისმეტყველო მეცნიერებების მიმართულებით; დაეუფლონ მოთხოვნადი მეცნიერებების საფუძვლებს და მოარგონ მომავლის პროფესია საკუთარ ინტერესებს. დაფუძნების დღიდან STEM სკოლის ერთწლიანი კურსი უკვე გაიარა 600-მდე მოსწავლემ. აღსანიშნავია, რომ საუკეთესო შედეგის მქონე 120-მდე ახალგაზრდას სიცოცხლის ხის ფონდი სწავლას სრულად უფინანსებს.